Маск не істейді?

Кәсіпкер Пентагонның болашақ соғыстарын зерттеуге арналған жобасын басқаруға қатысады. Project Meridian жобасын Пентагон басшысы Пит Хегсет жариялады. Жобаны Маскпен бірге қорғаныс технологияларын өндіретін Anduril Industries компаниясының негізін қалаушы Палмер Лаки және АҚШ Өкілдер палатасының бұрынғы спикері Ньют Гингрич басқарады.

Топ болашақ қақтығыстарда америкалық әскерге қандай технологиялар мен қару-жарақ қажет болатынын зерттейді.

Жоба нәтижесін дайындауға 120 күн берілген. Ұсынымдар қаңтардың соңына дейін Хегсетке ұсынылуы тиіс. Маск жобаға шектеулі кеңесшілік рөлде қатысады.

Маск пен Трамп неге араздасты?

Маск бұған дейін мемлекеттік шығындар мен қызметкерлер санын қысқартумен айналысатын DOGE құрылымында жұмыс істеген. Ол 2025 жылдың мамырында әкімшіліктен кеткен.

Маусымда Маск пен Трамп арасында ашық жанжал туып, кәсіпкер президенттің салық және шығындарға қатысты заң жобасын қатаң сынға алды. Маск бұл құжат бюджет тапшылығын арттырып, мемлекеттік шығындарды қысқарту әрекеттеріне кедергі келтіреді деп мәлімдеді.

Трамп оған жауап ретінде Маск компанияларына берілетін мемлекеттік келісімдер мен субсидияларды тоқтатуы мүмкін екенін айтты. Кейін Маск президентке импичмент жариялау туралы үндеуді қолдады.

Кейін кәсіпкер кейбір мәлімдемелерінің шектен шыққанын мойындады.

Қарым-қатынас қалай қалпына келді?

Кейін Маск пен Трамп қайта татуласты. Осы аптада кәсіпкер Ақ үйде Трамптың технологиялық компания басшыларымен жасанды интеллект қауіпсіздігіне арналған кездесуіне қатысты.

Project Meridian жобасына қосылуы – Масктің жанжалдан кейін Трамп әкімшілігімен ресми кеңесші ретінде қайта жұмысқа кірісуі.

Маск компаниялары Пентагонмен қазірдің өзінде бірқатар жобада жұмыс істеп келеді. SpaceX «Алтын күмбез» зымыранға қарсы қорғаныс жүйесіне арналған спутниктік инфрақұрылым жасауға қатысса, xAI Grok чат-ботын құпия әскери жүйелерде пайдалану туралы келісімге келген.